Bahria Town ki Jaidaadon ki Neelami 12 June ko – NAB ka Elaan

 

National Accountability Bureau (NAB) ne aik ahem iqdam uthate hue elaan kiya hai kay Bahria Town ki kai qeemti or arazi jaidaadein 12 June ko neelam ki jaen gi. Ye neelami NAB Ordinance 1999 kay Section 33-E kay tehat ki ja rahi hai, jiska maqsad plea bargain kay zariye hasil hone wali raqam ki adaigi na hone par vasooli karna hai.

NAB kay official bayan kay mutabiq, ye awaami neelami un afraad se raqam ki baramadgi kay liye ki ja rahi hai jinhon ne plea bargain to ki, lekin poori raqam ada nahi ki. Ye jaidaadein Islamabad or Rawalpindi kay mukhtalif ilaqon mein waqeh hain, or dilchaspi rakhny waly afraad ko boli lagany kay amal mein hissa lene ki dawat di gayi hai.

Neelami mein shamil chand aham jaidaadon mein Bahria Town ka Corporate Office jo kay Phase 2, Rawalpindi mein hai, shamil hai. Is kay ilawa, Robish Market or Garden City Golf Course kay qareeb aik commercial plot (Bahria Town Islamabad) bhi list mein mojood hai.

Aik or qabil-e-zikar jaidad Arena Cinema hai jo Plot No. 984, Phase 4, Bahria Town Rawalpindi mein waqeh hai. Safari Club bhi neelami mein shamil hai, jo kay Plot No. 27, Safari Villas 1, Rawalpindi mein hai. Ye sab jaidaadein apni location or commercial ahmiyat kay sabab se khas dilchaspi ka markaz ban chuki hain.

NAB ne neelami kay process ko asaan or shafaf banane kay liye aik neelami se pehly bhi schedule kiya hai, jo kay neelami se do din pehle NAB kay ilaqai daftar (Lal Masjid kay qareeb, Islamabad) mein munaqid hoga. Dilchaspi rakhne waly afraad ko mashwara diya gaya hai kay woh is session mein zaroor shirkat karen taake mukammal tafseelat hasil ki ja saken.

Ye neelami NAB ki taraf se aik ahem qadam hai taake defaulters ko zimmedar thehraya ja sake or awaami fundon ki baramdagi ko yaqini banaya ja sake. Is iqdam ko mali zimmedari or kanooni muahidon ki khilaf warzi kay khilaf sakht paigham kay tor par dekha ja raha hai.