Sabiq Wafaqi Wazir Abbas Afridi Gas Dhamaakay Mein Jaan Bahak, Kohat Mein Sog
Pakistan Muslim League-N (PML-N) k rehnuma aur sabiq wafaqi wazir Abbas Afridi gas leakage k dhamaakay mein shadeed jhulasne k baais inteqal kar gaye. Is afsosnak waqay mein teen doosray afraad bhi zakhmi huy.
Rescue 1122 k tarjuman Bilal Ahmed Faheem k mutabiq, dhamaakay k baad fori tor par imdadi teamon ne zakhmiyon ko Combined Military Hospital (CMH) Kohat pohanchaya. Abbas Afridi ki halat nazuk hone ki wajah se unhn airlift karke Burn Center Kharian, Punjab muntaqil kiya gaya. Kohat Police k tarjuman Nauman Ali ne tasdeeq ki k Abbas Afridi ilaj k doran zakhmon ki taab na laate huy jaan se chale gaye. Unki maiyat ab Kohat wapas laai ja chuki hai.
Waqia us waqt hua jab Abbas Afridi apne doston Dil Nawaz, Javed Afridi, aur Nadeem k sath aik hujray mein bethy huy thy. Achanak aik shadid gas leakage ka dhamaaka hua, jisne chaaron taraf ki deewaren tabah kar dein aur sab ko zakhmi kar diya.
Unki namaz-e-janaza 6 june shaam 5 baje Babri Banda, Kohat mein ada kiya gaya. Poora ilaqa aikk mohtram aur qabil-e-izzat rehnuma k inteqal par ghamzada hai.
Governor Khyber Pakhtunkhwa Faisal Karim Kundi ne Abbas Afridi k inteqal par gehre dukh izhaar kiya aur unky walid Senator Shamim Afridi aur bhai Amjad Afridi se afsos ka izhar kiya. Senate Chairman Yousaf Raza Gillani aur Deputy Chairman Zahid Khan ne bhi unhen aik nihayat shareef aur mukhlis shakhsiyat qarar dete huy khiraj-e-aqeedat pesh kiya.
Governor ne dhamaakay k sabab aur us ki type ka pata lagane k liye mukammal tahqiqat ka hukum de diya hai.
