Mashhoor stand-up comedian aur Bigg Boss 17 kay winner Munawar Faruqui ne Hyderabad ki tareekhi Badi Masjid, Musheerabad ka achanak daura kiya, jahan unko Jumma ki namaz ada kartay aur aik dil ko choo lene wala bayan dete dekha gaya. Unki is visit ki video social media par viral ho gayi hai.
Video mein Munawar Faruqui ko Allah ki tareef kartay, barkaton ki ahmiyat par roshni daalte aur apni zindagi kay kuch khaas waqiyat share kartay huy dekha gaya. Is mehfil mein former actress Sana Khan kay shohar Mufti Anas bhi unke saath nazar aaye. Social media par is video ko lekar logon kay milay julay reactions saamne aa rahe hain.
Abhi tak yeh saaf nahi hua kay Munawar Hyderabad kis silsile mein aaye hain.
Munawar Ka Safar – Comedy Se Reality Tak
Munawar Faruqui ne apna safar YouTube sketches jaise kay “Dawood, Yamraaj & Aurat” aur “Ghost Story” se shuru kiya. Unki shohrat tab bulandiyon ko chhui jab unho ne Kangana Ranaut kay reality show Lock Upp (2022) mein jeet hasil ki, uske baad Bigg Boss 17 (Jan 2024) ka taj bhi unke sar gaya. Apne tez zehan, mizaahi andaaz aur jazbaati touch kay liye woh logon mein kaafi maqbool hain.
Zati Zindagi Aur Karobari Masroofiyat
Munawar Faruqui ne Mehzabeen Coatwala se dosri shadi ki hai. Pehli shadi se unka aik beta hai jiska naam Mikael hai. Jabke Mehzabeen ko bhi pehle kay rishte se aik beti hai.
Karobari maamlaat ki baat karein to Munawar ne haal hi mein apni pehli web series First Copy se acting ka aghaaz kiya hai. Ab woh ane wale mahino mein kai live stand-up shows kay liye tayyari kar rahe hain.
Yeh Munawar Faruqui ka aik naya pehlu tha jo unke fans kay liye hairat ka sabab bana.
